Like
OK
Կայացավ Renault Arkana մոդելի պաշտոնական շնորհանդեսը
Դիլերներ
Դեկտեմբերի 6-ին Հայաստանում Renault-ի պաշտոնական ներկայացուցիչ «Մեգնա» ընկերությունը լրագրողների համար կազմակերպել էր թեսթ-դրայվ: Renault-ի ամենահետաքրքիր ավտոմեքենաներից մեկը` բյուջետային Duster-ը, մեր տրամադրության տակ էր մեկ ամբողջ օրվա ընթացքում:
Նման թեսթ-դրայվերը բավականին հազվադեպ են Հայաստանում, եւ կրկնակի հաճելի էր, որ այն կազմակերպված էր շատ լավ, ինչպես արտասահմանում անցկացվող նմանատիպ միջոցառումների ժամանակ. հանդիպում ավտոսրահում, որտեղ Duster-ը ներկայացվեց լրագրողներին, հարցազրույցներ ընկերության ներկայացուցիչների հետ:
Այնուհետեւ մասնակիցներին առաջարկվեց ինքնուրույն գնահատել այն, թե ինչո՞վ են այդպես հպարտանում Renault-ում: Մենք ուղեւորվեցինք Նուբարաշենի հրաձգարան, որտեղ հիանալի պայմաններ կան նման թեսթ-դրայվի համար:
Ինչո՞վ է հետաքրքիր մեր ավտոսիրողների համար այս մոդելը: Առաջին հերթին` գնով: Duster-ը ամենաէժան ամենագնացն է, որը պաշտոնապես վաճառվում է Հայաստանում:
Ամենահասարակ կոմպլեկտացիայով Duster-ը, որն առաջարկում է Renault-ն Հայաստանում, արժե 8.100.000 դրամ (մոտ $19.850): Սա 1.6 լիտրանոց 5-աստիճան մեխանիկական փոխանցման տուփով մեքենայի համար:
Լրագրողներին տրամադրել էին 2 լիտրանոց շարժիչներով ավտոմատ փոխանցման տուփով երկու եւ մեխանիկական փոխանցման տուփով մեկ ավտոմեքենա:
Մինչեւ Նուբարաշեն հասնելը, քաղաքում երթեւեկելիս, “Ավտոշքերթ” հեռուստահաղորդման հեղինակ Երվանդ Ղարիբյանի հետ եկանք այն եզրակացության, որ Duster-ը, լինելով իսկապես ամենագնաց ավտոմեքենա, այնուամենայնիվ, քաղաքում իրեն պահում է բավականին լավ “քաղաքացու” պես: Ավտոմեքենան շատ հեշտ էր հարմարվում ասֆալտի անհարթություններին, ղեկը, ինչպես նշեց Երվանդը, բավականին կառավարելի էր, եւ ճանապարհը պահում էր վստահ ու կառավարելի: Ղեկը կարելի է ֆիքսել երկու բարձրության վրա: Ընթացքում փորձեցինք շրջանցում անել, եւ 2 լիտրանոց շարժիչը մեխանիկական տուփի հետ շատ լավ կարողացավ հաղթահարել այդ դրվագը: Դինամիկան նման ավտոմեքենայի համար բավականին աշխույժ էր:
Ներքին հարդարման եւ հարմարավետության մասին իմ ու Երվանդի կարծիքները կրկին նույնն էին: Իհարկե, պետք չէ նման գնային սահմաններում առաջարկվող մեքենայում ակնկալել շատ որակյալ նյութեր եւ էրգոնոմիկա, բայց հաշվի առնելով ավտոմեքենայի արժեքը, կարելի է ասել, որ գնորդը կստանա համարժեք որակ: Ամեն ինչ իր տեղում է եւ ընդունելի որակ ունի, համենայնդեպս, մենք նույնիսկ անհարթ ճանապարհին չենք լսել ոչ մի ճռռոց կամ արտասովոր աղմուկ: Սրահը բավականին լայն է ու ազատ, հետեւում նստելիս ոտքերից մինչեւ դիմացի նստատեղը մոտ 9 սանտիմետր տարածություն կա: Միջին հասակի 3 հոգի կարող են հանգիստ տեղավորվել: Ինչպես երեւում է լուսանկարներից մեկում, մենք մի փոքր թեսթ արեցինք եւ լրագրողներից 4 հոգի տեղավորվեցին հետեւի նստատեղերում: Իհարկե, չի կարելի նման կերպ երթեւեկել, բայց եթե իսկապես անհրաժեշտ է, եւ երկար ճանախարհ պետք չէ գնալ, ապա Duster-ը կօգնի: Առավել եւս, որ մեքենաների լուսածերպը կազմում է 210 սանտիմետր, եւ 135 ձիաուժ հզորությունը բավարար են ուղեւորներով ծանրաբեռնված ճանապարհ ընկնել անգամ սարերով եւ ձորերով:
Renault-ը հայտարարում է, որ խառը ցիկլում վառելիքի ծախսը կազմում է 8.31 լիտր, եթե այդպես է, ապա դա ամենագնացի համար հոյակապ արդյունք է:
Լուսանկարում եւ տեսանյութում կարող եք տեսնել, թե ինչ բարձունքներ եւ արգելքներ են հաղթահարում մեքենաները: Հավատացեք, ղեկին նստած մի պահ թվում էր, որ 2-լիտրանոց շարժիչը չի կարողանա հաղթահարել դժվարությունները, բայց այս մեքենան մոտ 35-40 աստիճանի անկյունները բավականին հանգիստ էր բարձրանում:
Նշենք նաեւ Renault Duster-ի կոմպլեկտավորման հետ կապված մանրամասները. ղեկային ուժեղացված համակարգ, շարժական ղեկ, բորտ համակարգիչ, կոնդիցիոներ, 2 անվտանգության բարձիկ, ABS, դիմացի եւ հետեւի ապակիները էլեկտրակառավարմամբ, հետեւի ապակին տաքացվող, հայելիները` էլեկտրակառավարմամբ, կենտրոնական փականը` հեռակառավարմամբ, շարժման ժամանակ դռների ավտոմատ փակում, աուդիոհամակարգ CD/MP3, իմմոբիլայզեր, հակամառախուղային լուսարձակներ, դիմացի եւ հետեւի գլխատակերը եւ վարորդի նստատեղը բարձրությամբ կառավարվող, հետեւի նստատեղերը ծալվող 1/3-2/3, սրահը կտորից` ձայնակլանող, բեռնախցիկը 475 լ, (4x4) քարշակ, գործարանային ձուլված անվահեծեր R16:
Շատերը կարող են կարծիք արտահայտել, որ մոտ 20.000 դոլարի սահմաններում կարելի է գնել ավելի բարձրակարգ ամենագնաց, իհարկե, երկրորդական շուկայից: Բայց նրանք, ովքեր նույնիսկ մեկ անգամ գնել են նոր ավտոմեքենա, կարող են հստակ աել, որ սրահից ավտոմեքենա գնելու դեպքում առավելություները շատ են: Ամենգլխավորը` նոր ավտոմեքենան է, եւ դա նշանակում է, որ դուք առնվազն 3-5 տարի չեք ունենա տեխնիկական խնդիրներ, իսկ եթե նույնիսկ այսպիսիք լինեն, մեքենայի երաշխիքները կազատեն ձեզ շատ հոգսերից եւ, իհարկե, հավելյալ ծախսերից:
Կարեն Անտոնյան
Ծանուցումներ
Ծանուցումներ ստանալու համար անհրաժեշտ է մուտք գործել Ձեր հաշիվ։
