Volkswagen Commercial Vehicles-ը սեպտեմբերի 25-ից հոկտեմբերի 2 Հաննովերում կայանալիք կոմերցիոն ավտոմեքենաների ցուցահանդեսում կներկայացնի միանգամից մի քանի նորույթ: Մասնավորապես, ավտոսրահում կցուցադրվի 1 տոննա բեռնատարողությամբ ընկերության առաջին պիկապը: Այդ մեքենան արտադրվելու է Արգենտինայի Պաչեկո գործարանում սկսած 2009 թ. կեսերից: Ընկերությունը կցուցադրի նաեւ ունիվերսալ քաղաքային ավտոմեքենայի նոր տարբերակը` լիաքարշակ Caddy 4MOTION մոդելը: Caddy-ն սարքավորված կլինի խնայող 1,9 լիտրանոց տուրբոդիզելային շարժիչով` 105 ձիաուժ հզորությամբ եւ 6 աստիճան մեխանիկական փոխանցման տուփով: Caddy 4MOTION Life, Kombi եւ Box ավտոմեքենաները տարբեր կոմպլեկտացիաներով շուկայում կհայտնվեն արդեն այս տարվա աշնանը: Այդ ավտոմեքենան կդառնա միակ քաղաքային լիաքարշակ ունիվերսալը շուկայում:
Երրորդ նորույթը` PanAmericana կոնցեպտը, մշակվել է լիաքարշակ Caddy 4MOTION-ի հիմքի վրա` ակտիվ հանգստի եւ երկարատեւ ճանապարհորդությունների համար: Caddy ընտանիքի ամենագլխավոր ներկայացուցիչը Caddy Life Style Edition է, որը նույնպես կներկայացվի ընկերության տաղավարում:
Like
OK
