Էլեկտրական Porsche-ի վաճառքները կսկսվեն 2009 թվականին

Porsche-ի առաջին սերիական էլեկտրոմոբիլը վաճառքի կհանվի արդեն 2009 թվականին, գրում է գերմանական Wirtschaftswoche-ը: Համատեղ նախագիծն իրականացվել է Porsche AG եւ RUF Automobile ինժեներական բյուրոյի համագործակցության շնորհիվ: Առաջինը “կէլեկտրականացվի” Porsche 911 մոդելը: Էլեկտրական մարտկոցների օգտագործումն էականորեն կծանրացնի ավտոմեքենան. ներկայիս 1300-1400 կգ փոխարեն էլեկտրական տարբերակի քաշը կկազմի 1910 կգ, որոնցից 550 կգ բաժին է ընկնում մարտկոցներին:

Բնականաբար, այս փոփոխությունները կազդեն նաեւ դինամիկայի վրա. նախնական տվյալներով, էլեկտրական 911-ը մինչեւ 100 կմ արագություն է զարգացնելու 7 վայրկյանում, իսկ առավելագույն արագությունը կկազմի 225 կմ/ժ: Էլեկտրական ավտոմեքենայի համար դա ավելի քան արժանի ցուցանիշներ են, սակայն բենզինային Porsche-ները շատ ավելի արագ են ընթանում:

Ակնկալվում է, որ էլեկտրոմոբիլն արտադրվելու է փոքր խմբաքանակներով եւ վաճառվելու է Եվրոպայի բոլոր երկրներում: Էլեկտրական Porsche 911-ի մոտավոր գինը կկազմի 150 000 - 180 000 եվրո:

Facebook Odnoklassniki

4405 դիտում