Porsche-ի բաժնեմասը Volkswagen-ում մոտենում է 50%

Գերմանական Porsche Automobil Holding SE ավտոկոնցերնը հայտարարել է Volkswagen-ում իր բաժնեմասի հերթական ավելացման մասին` այս անգամ մինչեւ 42,6%: Այսպիսով, այս ձեռքբերումը լիովին համապատասխանում է Porsche-ի գործադիր տնօրեն Վենդելին Վիդեկինգի` մինչեւ տարեվերջ Volkswagen-ում ընկերության բաժնեմասը առնվազն մինչեւ 50% ավելացնելու պլաններին, հաղորդում է Associated Press-ը:

Ավելի վաղ, հոկտեմբերի 8-ին, Porsche-ն նույնպես հայտարարեց Volkswagen-ում իր բաժնեմասի հերթական ավելացման մասին: Ինչպես այդ ժամանակ նշել էր Porsche-ի պաշտոնական ներկայացուցիչ Ալբրեխտ Բամլերը, ընկերությունը ձեռք է բերել Volkswagen-ի բաժնետոմսերի ոչ մեծ արտաբորսայական փաթեթ` “շուկայականից էականորեն ցածր գնով”:

Հիշեցնենք, որ 2008թ. սեպտեմբերի 16-ին Porsche հայտարարեց Volkswagen-ում իր բաժնեմասը մինչեւ 35,14% ձայնի իրավունք ունեցող բաժնետոմսեր ավելացնելու մասին` 4,89% սովորական բաժնետոմսեր ձեռք բերելու շնորհիվ: Համաձայն գերմանական օրենքների, Volkswagen-ը դարձել է Porsche-ի դուստր ընկերությունը:

Volkswagen-ի նկատմամբ փաստացի հսկողություն ստանալու արդյունքում Porsche Automobil Holding ընկերությունը վերահսկողություն է հաստատում նաեւ գերմանական ավտոկոնցերնի դուստր ընկերության` Audi AG-ի նկատմամբ (բաժենտաիրական կապիտալի 99,14% չափով): Գերմանական օրենքների համաձայն, Porsche-ն այժմ պարտավոր է ոչ պարտադրող օֆերտա հայտարարել Audi-ի շրջանառության մեջ գտնվող մնացած բաժնետոմսերի համար, եւ ընկերության ղեկավարությունը մտադիր է մոտ ժամանակներս համապատասխան հայտարարություն ներկայացնել երկրի ֆինանսական կարգավորողներին: Չնայած, այդ օֆերտան խորհրդանշական բնույթ է կրելու, քանի որ խոսքը գնում է Audi-ի մոտավորապես 370 հազար բաժնետոմսերի մասին, որոնք իրենցից ներկայացնում են ամբողջ բաժնետիրական կապիտալի 0,86%: Այս փաթեթի շուկայական արժեքը գնահատվում է 170 մլն եվրո:
 

Facebook Odnoklassniki

3117 դիտում