Հրապարակվեցին 4-դռնանի Porsche Panamera-ի լուսանկարները

Վերջին երկու տարիներին Porsche-ում չէին թաքցնում, որ ընկերության ներսում ակտիվ աշխատանք է տարվում բոլորովին նոր 4-դռնանի կուպեի ստեղծման ուղղությամբ, որը պետք է դառնա ամենախոշոր ավտոմեքենան ընկերության պատմության ընթացքում (Porsche-ում պնդում են, որ դա սեդան չէ, այլ հենց 4-դռնանի կուպե): Եվ ահա վերջապես, Porsche-ն հրապարակեց այդ մոդելի պաշտոնական լուսանկարները եւ տեխնիկական տեղեկատվությունը նրա մասին: Լուսանկարները վաղուց էին արվել, սակայն Porsche-ն արգելել էր հրապարակել դրանք մինչ այս օրը:

Եվ այսպես, պարզ դարձավ, որ Porsche Panamera-ի երկարությունը կկազմի գրեթե 5 մետր: Ավելի ստույգ` 4970 մմ: Այսինքն, ավտոմեքենան փոքր-ինչ կարճ կլինի Mercedes-Benz S-դասից եւ BMW 7-չդ սերիայից: Իսկ դա նշանակում է, որ ավտոմեքենայի սրահում իրոք շատ տեղ կլինի ոչ միայն վարորդի, այլեւ ետեւի ուղեւորների համար, որոնց մասին ինչպես կարգն է հոգացել են:
 
Ինչպես եւ նախատեսվում էր նախկինում, ամենահամեստ Panamera-ն կունենա 3,6 լիտր ծավալով բենզինային շարժիչ, որը կմշակեն Volkswagen-ի մասնագետները: Շարժիչն ունենալու է 300 ձիաուժ հզորություն: Լինելու է նաեւ V8 շարժիչ` 4,8 լիտր ծավալով: Իսկ ահա դիզելային տարբերակներ չեն լինելու: Դրանց փոխարեն վառելիքը տնտեսելու սիրահարներին կառաջարկվի հիբրիդային տարբերակ, որում կմիավորվեն բենզինային V6 շարժիչը եւ էլեկտրական շաժիչը:
 
Կլինեն երկու փոխանցման տուփեր. ստանդարտ մեխանիկական եւ նորարարական ավտոմատ` երկու շղթայակցմամբ եւ արագությունները ձեռքով փոխելու հնարավորությամբ:

Facebook Odnoklassniki

3116 դիտում