Porsche ընկերությունը մեկ ամսով հետաձգել է Panamera մոդելի պրեմիերան

Porsche ընկերությունը որոշում է կայացրել մեկ ամսով հետաձգել Panamera մոդելի պրեմիերան: Այս ավտոմեքենայի մեկնարկը կկայանա ոչ թե հաջորդ տարվա մարտին Ժնեւի ավտոսրահում, ինչպես նախատեսվում էր, այլ Շանհայի ցուցահանդեսում, որը բացվում է ապրիլի 20-ին: Այս մասին հաղորդում է Automotive News Europe-ը` վկայակոչելով գերմանական ավտոարտադրողի ներկայացուցիչների հայտարարությունները:

Ինչպես հաղորդում են Porsche-ում, Panamera մոդելի պրեմիերայի տեղափոխումը Շանհայ կապված է գերմանական արտադրողի համար չինական եւ այլ ասիական շուկաների աճող կարեւորության հետ: Նախորդ ֆինանսական տարում Porsche-ի վաճառքները Չինաստանում նախորդող տարվա համեմատությամբ կրկնապատկվել էին եւ հասել 8190 ավտոմեքենաների, մինչդեռ Եվրոպայում եւ Հյուսիսային ամերիկայում իրացվող ավտոմեքենաների թիվը նշանակալիորեն կրճատվել է:

Հիշեցնենք, որ Porsche Panamera-ի արտադրությունը կսկսվի հաջորդ տարի: Գերմանական ավտոարտադրողը մտադիր է թողարկել տարեկան մոտ 20 հազար Panamera: Նախնական տեղեկատվությամբ, Եվրոպայում ստանդարտ համալրվածությամբ այս նորույթի գինը կսկսվի 80 հազար եվրոյից:

Facebook Odnoklassniki

2983 դիտում