b x a .

Jaguar Land Rover Road Show-ն վերադառնում է

remove_red_eye2114

Սեպտեմբերի 8-9-ին բրիտանական Jaguar եւ Land Rover ապրանքանշանների պաշտոնական ներկայացուցիչ «Ֆորա Պրեմիում» ընկերությունն արդեն երկրորդ անգամ Հայաստանում նախաձեռնում է Jaguar Land Rover Road Show միջոցառումը, որի նպատակն է լայն հանրությանն ավելի հասանելի դարձնել բրիտանական արտադրության ավտոմեքենաները` հնարավորություն տալով ցանկացողներին անձամբ փորձարկել դրանք բարդագույն պայմաններում: Միջոցառումը անց է կացվելու JLR տարածաշրջանային ներկայացուցչության հովանու ներքո: Սա մեկն է նմանատիպ միջոցառումներից, որոնք պարբերաբար իրականացվում են բրենդի պաշտոնական դիլերների կողմից ամբողջ աշխարհով մեկ: 

Ինչպես Auto.am-ին հայտնեցին «Ֆորա Պրեմիում» ընկերությունում, փորձարկումները կանցկացվեն Jaguar Land Rover Experience ռուսաստանյան կենտրոնի փորձառու հրահանգիչների ուղղորդմամբ, ինչը ոչ միայն թույլ կտա առավել ամբողջական դարձնել ծանոթությունը ավտոմեքենաների հետ, այլեւ կապահովի միջոցառման մասնակցիների եւ հյուրերի անվտանգությունը:

Արտաճանապարհային Land Rover ավտոմեքենաների փորձարկման համար նախատեսված են «Տերապոդ» կոչվող հատուկ սարքերը, որոնք կրկնօրինակում են արտաճանապարհային պայմաններ եւ հնարավոր են դարձնում այս հզոր ամենագնացների ունակությունների բացահայտումը:

Միեւնույն ժամանակ բոլոր այն մասնակիցները, որոնք կցանկանան փորձարկել Jaguar բրենդի մոդելները, հնարավորություն կստանան սեփական փորձով գնահատել դրանց բացառիկ հարմարավետությունը, կառավարելիությունը ու բազմաթիվ նորագույն տեխնոլոգիաները: 

Կազմակերպիչները չեն մոռացել նաեւ ամենակրտսեր հյուրերին: Երեխաները կկարողանան հատուկ նախապատրաստված հրապարակում փորձարկել Jaguar Land Rover ֆիրմային էլեկտրական մինի-ավտոմեքենաները: Նրանց սպասում են նաեւ տարատեսակ այլ զվարճանքներ եւ խաղեր:

Ավտոմեքենաների փորձարկմանը  վարորդի կարգավիճակով կարող են մասնակցել 22 տարին լրացած եւ առնվազն երկու տարվա վարորդական փորձ ունեցող անձիք: Այս պայմանին չհամապատասխանող մնացած մարդիկ կարող են մասնակցել որպես ուղեւոր: Միջոցառումը բաց է նաեւ ԶԼՄ ներկայացուցիչների համար՝ ընդհանուր հիմունքներով: Մասնակցության համար բացված է գրանցման հատուկ ձեւ, որը տեղադրված է landroverarmenia.am եւ jaguararmenia.am կայքերում: 

Jaguar Land Rover Road Show միջոցառումը տեղի կունենա սեպտեմբերի 8-ին եւ 9-ին Երեւանում, Աճառյան 42 հասցեում՝ «Ֆորա Պրեմիում» ընկերության ավտոսրահի տարածքում:

Միջոցառմանը մասնակցել հնարավոր է միայն նախապես գրանցումով: Գրանցման համար զանգահարել 010 617 000 կամ 099 282 103 հեռախոսահամարներով:

Տեղում մասնակիցների գրանցումը կսկսվի ժամը 08:45-ից եւ կտեւի մինչեւ 19:30: